Sarea

Donostiako Protokoloaren inplementazioan eragile aktibo izateko konpromisoa agertu dute euskal sindikatuek

dav

Euskal gehiengo sindikala Donostiako Protokoloari atxikitu zaio Donostiako Miramar jauregian egindako agerraldian. Protokoloa osatzeko prozesuan partaide izan ziren LAB eta ELAri, EHNE, ESK, STEILAS eta HIRU gehitu zaizkie. Eragile sozialen eta bereziki sindikatuen parte hartzearen garrantzia nabarmendu dute agerraldian Garbiñe Aranburuk eta Adolfo ‘Txiki’ Muñozek, hurrenez hurren, LABeko eta ELAko idazkari nagusiek.

Hizkuntza Eskubideak Bermatzeko Protokoloa balioan jarri dute sindikatuetako ordezkariek. Balio horren inguruan hitz egin du ELAko idazkari nagusi ‘Txiki’ Muñozek, “Donostiako Protokoloa interesgarria da langileen hizkuntza-eskubideak bermatzeari begira, neurri zehatzak biltzen dituelako eta honekin batera, guk ere badauzkagulako ekarpenak egiteko arlo honetan”. Horrekin batera, gizarte eragileen artean osatu izana duela indargune nabarmendu dute.

Printzipio demokratikoa den heinean, Euskal Herrian euskaraz bizitzeko eta lan egiteko eskubidea aldarrikatu dute agerraldian nola ELAko idazkari nagusiak hala LABekoak.

ELAk epe laburrean egingo duen kongresuan gaiari emango dioten ikuspegia ere azaldu du Muñozek: “hizkuntza-eskubideen borroka berdintasuna, demokrazia, justizia soziala eta klase borrokaren parte dela, hain zuzen ere”.

Ildo berean, LABeko idazkari nagusi izendatu berriak, Garbiñe Aranburuk, egin berri duten Biltzar Nagusian ildo honetan hartutako erabakiari egin dio erreferentzia: “lan mundua euskalduntzen jarraitzea izango da gure lan ildoetako bat eta instituzioei horretarako erabaki politikoak har ditzaten exigitzen jarraitzea. Hori guztia ekintza sindikalaren bitartez”. Hizkuntza-politika ausart eta burujabeak aldarrikatu ditu Aranburuk.

Aranbururekin eta Muñozekin batera, EHNEko Joxean Odriozola, STEILASeko Susana Egia, HIRUko Jaione Ugalde eta ESKko Antonio Perez egon dira agerraldian.

Protokoloa Euskal Herriko administrazio ezberdinei begira interpelaziorako tresna dela esan dute. Eta haiek lehen mailako erantzukizuna daukate herritarron eta langileon hizkuntza-eskubideak bermatzeko eragile sindikalen ustez. Ildo horretan erabaki politikoak, neurri eraginkorrak eta baliabideak martxan jartzea eskatu dute.

Sindikatuetako ordezkariek, erantzukizunez jokatzeko konpromisoa berretsi dute, lan munduan euskara normalizatzeko eta langileen hizkuntza-eskubideen defentsari leku handiagoa eginez. Protokoloa praktikara eramateko konpromisoa adierazi dute.

Kontseiluko idazkari nagusi Paul Bilbaok sindikatuetako ordezkariei euren inplikazioagatik eskerrak ematearekin batera, honen garrantzia nabarmendu du: “aitortza egin behar diegu ELA eta LAB sindikatuei Protokoloa osatu bitartean ekarpenak egin zizkigutelako. Hasieratik izan ditugu Protokoloan partaide eta bidaide. Eta, noski, ongi etorria eman nahi diegu STEILAS, EHNE, HIRU eta ESK sindikatuei Protokoloarekin bat egiteagatik”.

“Hizkuntza gutxituen berreskurapenaren alde lan egiten duten erakundeez haratago jo nahi dugu eta hizkuntza baten berreskurapen prozesuan subjektu asko dagoela kontuan hartuta, beste ezaugarriak dituzten gizarte eragileetara ere jotzen hasi gara, eta hor lehen lerroan sindikatuak genituen. Euskal Herriko kaiera prestatzen ari garen honetan, sindikatuen ekarpena oso garrantzitsua izango da”, gehitu du Bilbaok.

2016ko abenduaren 17an Kursaalen egindako gizarte eragileen ahalduntze historikoa irudikatu zuen ekitaldia egin zen unetik hasi zuen bere bidea Donostiako Protokoloak. Hizkuntza gutxituak dituzten herrialdeetan, bertan jasota dauden lan-ildoei helduz. Eragileen atxikimenduak batzea, Gobernuen inplikazioa, Nazioarteko instituzioetan erreferentzia lantzea eta kaierak prestatzea.

Bilbaoren ustez, Euskal Herrian “euskaldunon hizkuntza-eskubideak bermatzeko jauzi kualitatiboak egiteko garaia dela uste dugu: euskaraz bizi nahi dut aldarrikatu eta aldarrikatzen ari gara ozen. Hartara, hori egikaritzeko beharrezkoa da Protokoloaren inplementazioa ahalbidetzea”.

Amaitzeko, Bilbaok harro gogorarazi du “Protokoloa da inoiz babes handiena lortu duen hizkuntza-politikari lotutako proposamena. Hori Kursaalen argi geratu zen moduan, gaur ere hori irudikatu dugu”.

Saretu:

, , , , , , , ,

No comments yet.

Utzi erantzuna