Sarea

Nafarroako Gobernuko Ana Ollo kontseilariarekin bildu da Kontseilua ‘Geroa Euskaratik’ adierazpeneko urgentziako neurriak aztertzeko

‘Geroa Euskaratik’ adierazpena aurkeztu zuen Kontseiluak ekainean egindako agerraldian, bazkideak alboan zituela. Pandemiari aurre egiteko euskalgintzarako urgentziazko neurriak jasotzen ditu adierazpenak, eta horiek orain paperetik errealitatera jauzi egin dezaten, erakunde pribatu zein publikoekin bilera erronda egingo du Kontseiluak.

Hain zuzen ere, Ana Ollo Nafarroako Gobernuko Herritarrekiko eta Erakundeekiko Harremanetarako kontseilariarekin batzartu dira Iruñean Alizia Iribarren AEK-ko koordinatzaile nagusia eta Kontseiluko zuzendaritzako kidea, eta Paul Bilbao Kontseiluko idazkari nagusia. Alboan ere izan dute Mikel Arregi Euskarabideko burua. Nafarroako Gobernuaren Egoitzan egin dute batzarra, eta bilera errondako aurreneko hitzordua izan da.

‘Geroa Euskaratik’ adierazpena

COVID-19ak kezka handia sortu du euskalgintzan. Izan ere, inork gutxik jakin dezake zenbaterainokoa izango den krisi honen eragina, ezta zer nolako bilakaera izango duen ere. Hala ere, garbi dagoena da eragina bizia bezain larria izaten ari dela. Azken finean, krisiak gure gizartearen gabeziak utzi baititu agerian, eta zaurgarrienak eta gutxitutako taldeak kolpatu ditu gogorren. Hizkuntza eskubideen kasuan beste hainbeste gertatu da: ​euskal hiztun komunitatean eskubideak zapalduak izan dira ustezko berehalakotasunaren eta lehentasunaren izenean, eta euskalgintzarekiko erakundeen babes falta​ are begi bistakoagoa izan da.

Hori dela eta, Kontseiluak lehen diagnostikoa osatu, eta krisiari aurre egiteko beharrezko neurriak jaso ditu ‘Geroa Euskaratik’ adierazpenean. Hala nola, hezkuntzaren esparruan, kulturan, helduen euskalduntzean zein eremu digitalean, besteak beste (adierazpena osorik hemen).

Bilera erronda: Nafarroako Gobernua

Adierazpenean jasotako neurri horiek aurkeztu dizkiote Bilbaok eta Iribarrenek Ana Ollo kontseilariari, erakunde nafarrari dagozkionak lehenbailehen martxan jarri ditzan. Gainera, Gobernuak abian jarritako Nafarroa Suspertu planari ere ekarpen zehatza aurkeztu dio Kontseiluak, eta hori ere hizpide izan dute. Hala ere, pandemiaren ondorioak, oinarrizko eskubideak eta hizkuntza politikak izan dira batzarraren ardatza. Horiek ere kontutan hartu behar baitira gizarte berdinzalego eta kohesionatuago bat lortu nahi bada.

Nafarroako Gobernuarekin izandako batzarra bilera errondaren hasiera besterik ez da izan. Datozen asteotan ordezkari publiko eta pribatuekin bilduko da Kontseilua, eta irailean ere jarraituko du ‘Geroa Euskaratik’ proposamena ezagutzera ematekn eta neurri horiek hartzeko konpromisoak lotzen.

Saretu:

No comments yet.

Utzi erantzuna