Euskararen Gizarte Eragileen Kontseiluak euskararen normalizazio prozesua azkartzeko hainbat proiektu garatzen ditu alor edo sektore desberdinetan: hizkuntza-politika eta administrazioa, enpresak eta kontsumitzaileak, nazioartea, hezkuntza, osasungintza, arnasgunean, helduen euskalduntze eta alfabetatzea…
Donostiako Protokoloa eta Euskal Herrirako kaiera
2016ko abenduan aurkeztutako Donostiako Protokoloaren ezarpena Euskal Herrian izango da proiektu nagusietako bat. Hizkuntza Eskubideak Bermatzeko Protokoloa oinarri, Euskal Herriko Kaiera osatzea da helburua. Euskalgintzatik abiatuta esparru desberdinetan lanean ari diren eragileetara ere iristeko bokazioa du proiektuak. Horretarako, sektore desberinekin lanketa egiten ari gara.
Bestetik, Europan ere ahalik eta hedapena handiena izan dezan lan egingo da, hizkuntza gutxiagotuak dituzten herrialdeetan aurkezpenak eginez eta atxikimenduak bilduz.
Euskara ofiziala Nafarroa osoan
Nafarroako hainbat herritan euskararen ofizialtasuna Nafarroa osora heda dadin eskatzeko lanean ari gara. Pertsonen artean desberdinatasunak sortzen dituen Vascuencearen Legea erauzi eta Euskararen Legea egiteko, plangintza eraginkorrak ezartzeko, euskararentzako baliabide duinak lortzeko eta euskaraz bizitzeko nahia hedatzeko egingo da lan.
Euskara denontzat doan
Heldutan euskara ikasteak ahalegin inteketualaz gain ahalegin ekonomikoa eskatzen du gaur egun. Eskubide hori (euskara ezagutzea) herritar guztiek bermatua izan dezaten lanean ari gara Helduen Euskalduntze eta Alfabetatzean lan egiten duten eragileekin batera.
Baduzu
Euskal kontsumitzaileen kluba da Baduzu . Euskaraz saldu eta kontsumitu nahi duten pertsonen bilgunea izatea du helburu proiektuak. Horretarako, www.baduzu.eus webgunea eta sakeleko telefonoetarako aplikazioa ditu oinarri. Kontsumitzaile irizpideduna izatea euskaraz kontsumitzea ere badelako.
Urola kostako alor sozioekonomikoa euskalduntzeko dinamika
Urola Kostako (Gipuzkoa) eskualdean esperientzia pilotu integrala jarriko da martxan eragile sozioekonomikoak elkarlanean jarriz. Sindikatuekin, kontsumitzaileekin, administrazioarekin eta bertako euskalgintzarekin garatuko da.
Interneten ere, lehen hitza euskaraz
PuntuEus Fundazioarekin, Ikastolen Elkartearekin eta CodeSyntaxekin elkarlanean landutako ekimena da #lehenhitza kanpaina. Interneteko nabigatzailea eta gailu mugikorrak euskaratzeko kanpaina da. Sarean ere euskaldun gisa agertzea du helburu.